Telekommunikasiya vasitələrinə marağın və onların əməli tətbiqinin artımı sürəti iqtisadi tədavülün və ümumilikdə ictimai münasibətlərin inkişafı sürətinə düz mütənasibdir. Əslində, məhz telekommunikasiya vasitələrinin tətbiqi danışıqların aparılması, müqavilələrin bağlanması və ümumən işlərin irəliləməsi sürətini təcillə gücləndirir. Bu isə öz növbəsində insan əməyinin faydalı iş əmsalının artmasına gətirib çıxarır. Bu gün ən yayılmış telekommunikasiya vasitələrinə aiddir: internet və digər oxşar elektron məlumat şəbəkələri, mobil rabitə vasitələri, kabel televiziyası və sair. Bununla belə, təcrübədə internet provayderlərinin, mobil rabitə və kabel televiziyası operatorlarının fəaliyyətlərinin qanunvericiliklə tənzimlənməsində böyük boşluqlar hiss olunur. Məsələn, internet gücünün təqdim edilməsi məsələləri, telekommunikasiya sahəsində müxtəlif icazələrin verilməsi qaydaları yetərincə tənzimlənməmişdir. Bu qarışıq qanunvericiliyin tətbiqində mütləq ixtisaslaşmış və çağdaş texnologiyaların incəliklərinə yaxından bələd olan hüquqşünasın yardımına ehtiyac vardır.