Şirkətimizin xidmət istiqamətlərindən biri də nəqliyyat sahəsində hüquqi xidmətlərin göstərilməsidir. Mallar, işlər və xidmətlər dövriyyəsinin həndəsi çoxalma ilə artdığı bazar iqtisadiyyatına keçid şəraitində həmin dövriyyənin aparıcı sütunu olan nəqliyyatla bağlı münasibətlər misilsiz mühümlüyə sahib olur. Ölkəmizin ərazisinin həm yerli, həm də transmilli, bölgəsəl daşımalar üçün istifadə edildikcə, iqtisadiyyatımızda nəqliyyatın yeri daha yaxşı izlənir. Axı ölkəmizin coğrafi yerinə görə, habelə onun nəqliyyat infrastrukturunun müasirləşdirilməsi fonunda onun ərazisinin malların və sərnişinlərin daşınması məqsədi ilə istifadəsi həm yerli, həm də transmilli müəssisələr üçün getdikcə daha sərfəli və aktual olur. Nəqliyyatın maddi istehsal sahəsi baxımından fərqli cəhəti ondan ibarətdir ki, o yeni maddi nemətlər yaratmır və ona görə də cəmiyyətin varidatını artırmır. Onun məhsulu yüklərin və insanların məsafələrə daşınması üzrə fəaliyyətdir. Sənayenin, ticarətin və sair mühüm sahələrin ahəngdar işi nəqliyyat müəssisələrinin mütəmadi, dəqiq işləməsindən, yüklərin və sərnişinlərin vaxtında daşınmasından asılıdır.